मुंबई, दि. 29 : जळगाव जिल्ह्यात मुख्यमंत्री माझी लाडकी बहीण योजनेच्या थकीत हप्त्यांवरून महिलांचा संताप उसळला असून, संतप्त महिलांनी महिला व बालविकास कार्यालयावर धडक देत प्रशासनाला जाब विचारला. अनेक महिन्यांपासून अनुदान खात्यात जमा न झाल्याने शेकडो महिलांनी आक्रमक भूमिका घेतली.
जिल्ह्यात सुमारे १० लाखांहून अधिक महिला या योजनेसाठी पात्र असून त्यापैकी १ लाखांहून अधिक महिलांच्या खात्यात अद्याप पैसे जमा झाले नसल्याची माहिती समोर आली आहे. प्रशासनातील गोंधळ आणि तांत्रिक अडचणी हे यामागील मुख्य कारण असल्याचा आरोप महिलांनी केला आहे.
अनेक लाभार्थी महिलांनी e-KYC प्रक्रिया वारंवार पूर्ण करूनही तांत्रिक त्रुटी, बँक पडताळणीतील अडथळे किंवा प्रणालीतील चुका यामुळे पैसे अडकून पडल्याचे सांगितले. राज्यातील इतर भागातही e-KYC पूर्ण केल्यानंतरही दोन महिन्यांचे पैसे न मिळाल्याच्या तक्रारी समोर आल्या आहेत.
याशिवाय, निवडणूक आचारसंहितेमुळे काही ठिकाणी नवीन लाभार्थी नोंदणी किंवा आगाऊ रक्कम वितरणावर मर्यादा आल्याचेही सांगितले जात आहे. दरम्यान, अधिकारी व अंगणवाडी सेविकांमध्ये जबाबदारी ढकलली जात असल्याची तक्रार महिलांनी केली आहे.
या आंदोलनानंतर प्रशासनाने तांत्रिक त्रुटी दूर करून प्रलंबित हप्ते जमा करण्याचे लेखी आश्वासन दिले. त्यानंतर महिलांनी आंदोलन तात्पुरते स्थगित केले.
लाडकी बहीण योजना ही राज्यातील पात्र महिलांना दरमहा आर्थिक सहाय्य देण्यासाठी सुरू करण्यात आली असून सध्या या योजनेच्या अंमलबजावणीवर प्रश्नचिन्ह उपस्थित होत आहे.