पुणे, दि. 29 : महाराष्ट्र वीज कंत्राटी कामगार संघ (संलग्न : भारतीय मजदूर संघ) यांच्या वतीने वीज कंत्राटी कामगारांचा भव्य विजय मेळावा पुण्यात मोठ्या उत्साहात पार पडला. ठाणे औद्योगिक न्यायालयाने दिलेल्या ऐतिहासिक निकालानुसार 2285 वीज कंत्राटी कामगारांना कायम करण्याचा निर्णय झाल्याच्या पार्श्वभूमीवर या मेळाव्याचे आयोजन करण्यात आले होते. राज्यभरातून सुमारे 1167 वीज कंत्राटी कामगारांनी या मेळाव्यास उपस्थिती लावली.
या वेळी भारतीय मजदूर संघाचे महाराष्ट्र प्रदेश अध्यक्ष मा. अनिल ढुमणे यांनी मार्गदर्शन करताना सांगितले की, हा निकाल केवळ महाराष्ट्रासाठी नव्हे तर संपूर्ण देशातील कंत्राटी कामगारांसाठी दिलासादायक व प्रेरणादायी आहे. वीज कंत्राटी कामगार संघाने रस्त्यावर उतरून केलेली आंदोलने, पुणे–मुंबई पायी मोर्चा, मंत्रालयावर धडक मोर्चा, नागपूर येथील आंदोलन तसेच संविधान चौकातील उपोषण या संघर्षांची त्यांनी विशेष दखल घेतली. पुढील काळात विविध उद्योगांतील कंत्राटी व असंघटित कामगारांना लेबर कोडमधील लाभ मिळवून देण्यासाठी संघटनेने अधिक प्रभावी लढा उभारावा, असे आवाहन त्यांनी केले.
ज्येष्ठ मार्गदर्शक मा. अण्णाजी देसाई यांनी वीज उद्योगातील दीर्घकालीन कामगार चळवळीचा आढावा घेत संघटनेने मिळवून दिलेली 20% व 19% वेतनवाढ तसेच नोकरी सुरक्षेसाठी (Job Security) केलेले प्रयत्न महत्त्वपूर्ण असल्याचे नमूद केले. या मागण्यांवर शासनाकडून सकारात्मक निर्णय अपेक्षित असल्याचेही त्यांनी सांगितले.
या मेळाव्यास भारतीय मजदूर संघाचे प्रदेश अध्यक्ष अनिल ढुमणे, ज्येष्ठ मार्गदर्शक अण्णाजी देसाई व ज्येष्ठ वकील विजय वैद्य हे प्रमुख वक्ते होते. राज्यसभा खासदार मा. डॉ. मेधा कुलकर्णी यांनी उपस्थित राहून कामगारांना पुढील वाटचालीस शुभेच्छा दिल्या. उर्वरित प्रश्नांबाबत ऊर्जामंत्री मा. ना. देवेंद्र फडणवीस यांच्याकडे पाठपुरावा करून कामगारांना न्याय मिळवून देण्याचा निर्धार त्यांनी व्यक्त केला.
महिला पदाधिकारी श्रीमती बेबी राणी डे व ज्योती कदम यांनी मा. मेधाताईंचे स्वागत केले.
संघटनेचे माजी अध्यक्ष व मान्यवर शरद संत, श्रीपाद कुटासकर, सुभाष सावजी, धनंजय इनामदार, विजय मुळगुंद, आप्पा जाधव, अनंतराव मोडक, अण्णासाहेब धुमाळ, बाळासाहेब कांबळे, अर्जुन चव्हाण तसेच सर्व साक्षीदारांचा संघटनेतर्फे सत्कार करून कृतज्ञता व्यक्त करण्यात आली.
या मेळाव्यात संघटनेचे अध्यक्ष निलेश खरात, कार्याध्यक्ष अमर लोहार, सरचिटणीस सचिन मेंगाळे, उपसरचिटणीस राहुल बोडके, संघटनमंत्री उमेश आणेराव व कोषाध्यक्ष सागर पवार यांनी संघटनेची आगामी दिशा व भूमिका स्पष्ट केली.
13 वर्षांच्या दीर्घ व कठीण संघर्षानंतर जिद्द, चिकाटी व सातत्यामुळे हे सामूहिक यश मिळाले असल्याचे मत व्यक्त करण्यात आले. वीज कामगारांच्या न्याय्य मागण्यांसाठी येत्या काळात राज्यव्यापी आंदोलन अधिक व्यापक स्वरूपात छेडण्याचा ठराव मेळाव्यात एकमताने मंजूर करण्यात आला.
हा मेळावा यशस्वी करण्यासाठी पुणे येथील संघटनेचे पदाधिकारी सुमीत कांबळे, निखिल टेकवडे, मार्गदीप मस्के, प्रवीण पवार व त्यांच्या संपूर्ण टीमने मोलाचे योगदान दिले.