मुंबई : कांदिवली येथील रहिवासी आणि मराठी अभिनेत्री हेमलता आदित्य पाटकर (उर्फ हेमलता बाणे) तसेच तिची सहकारी अम्रिना इक्बाल झवेरी यांना एका बिल्डरकडून तब्बल १० कोटी रुपयांची खंडणी मागितल्याप्रकरणी मुंबई पोलिसांनी डिसेंबर २०२५ मध्ये अटक केली आहे. ही कारवाई मुंबई पोलिसांच्या खंडणीविरोधी पथकाने (Anti-Extortion Cell) केली आहे.
पोलिसांच्या माहितीनुसार, या प्रकरणाची सुरुवात नोव्हेंबर २०२५ मध्ये अंधेरी येथील एका हॉटेलमधील लिफ्टमध्ये झालेल्या वादातून झाली. या वादानंतर संबंधित बिल्डरच्या मुलाला खोट्या विनयभंग प्रकरणात अडकवण्याची धमकी देत मोठ्या रकमेची खंडणी मागण्यात आली असल्याचा आरोप आहे.
सुरुवातीला आरोपींनी १० कोटी रुपयांची मागणी केली होती. मात्र, नंतर तडजोडीअंती ही रक्कम ५.५ कोटी रुपयांवर निश्चित करण्यात आली. तक्रारदार बिल्डरने पोलिसांकडे धाव घेतल्यानंतर खंडणीविरोधी पथकाने लोअर परळ परिसरात सापळा रचला.
या कारवाईदरम्यान आरोपी महिलांना १.५ कोटी रुपये स्वीकारताना रंगेहाथ पकडण्यात आले. विशेष बाब म्हणजे, या सापळ्यासाठी पोलिसांनी ३० हजार रुपये खऱ्या नोटांमध्ये तर उर्वरित रक्कम ‘चिल्ड्रन्स बँक ऑफ इंडिया’च्या बनावट नोटांच्या स्वरूपात वापरली होती.
अटकेनंतर दोन्ही आरोपींना न्यायालयात हजर करण्यात आले असता, न्यायालयाने त्यांना सोमवारपर्यंत (२९ डिसेंबर २०२५) पोलीस कोठडी सुनावली आहे.
दरम्यान, या प्रकरणात उत्कर्ष नावाचा तिसरा आरोपी फरार असून त्याचा शोध घेण्यासाठी पोलिसांची पथके कार्यरत आहेत. प्राथमिक तपासात ही संघटित खंडणी टोळी असल्याचे संकेत मिळाले असून, त्यांनी यापूर्वीही अशाच प्रकारे लोकांना धमकावल्याचा संशय पोलिसांनी व्यक्त केला आहे. पुढील तपास सुरू आहे.