पुणे दि. 7 : दक्षिण आफ्रिकेविरुद्धच्या तिसऱ्या-अंतिम एकदिवसीय सामन्यात टीम इंडियाने 9 विकेट्सने दणदणीत विजय मिळवत मालिका 2-1 अशा फरकाने जिंकली आहे. दक्षिण आफ्रिकेने भारतासमोर 271 धावांचे आव्हान ठेवले होते. हे आव्हान भारताने तब्बल 61 चेंडू आधी फक्त 1 विकेटच्या मोबदल्यात पूर्ण केले.
भारताची दमदार सुरुवात रोहित शर्मा आणि यशस्वी जैस्वाल यांनी दिली. या सलामी जोडीने 155 धावांची शतकी भागीदारी रचत विजयाची मजबूत पायाभरणी केली. दोघांनी संयमी आणि नंतर आक्रमक अशी खेळी साकारली.
रोहित शर्मा दमदार फॉर्ममध्ये दिसला. त्याने 75 धावा करत अर्धशतक झळकावले. शतकासाठी वाटचाल सुरू असतानाच षटकारासाठी खेळताना तो बाद झाला. मात्र त्याने भारताचा विजय जवळ आणला होता. दुसरीकडे यशस्वी जैस्वालने नाबाद खेळी करून संघाला विजयी क्षण गाठून दिले.
भारताने 39.5 षटकांतच सामना जिंकत एकतर्फी वर्चस्व सिद्ध केले. यापूर्वी दक्षिण आफ्रिकेने मालिका बरोबरी करण्याचा प्रयत्न केला होता, परंतु निर्णायक सामन्यात भारताने खेळाच्या सर्वच विभागांत उत्कृष्ट प्रदर्शन करत मालिका आपल्याकडे खेचली.
या विजयानंतर भारतीय संघाने आगामी स्पर्धांसाठी आत्मविश्वास अधिक वाढवला आहे.