मुंबई, दि. 1: नगरपरिषदा व नगरपंचायतींच्या सार्वत्रिक निवडणुकीसाठीची जाहीर प्रचाराची समाप्ती 1 डिसेंबर 2025 रोजी रात्री 10 वाजता होणार आहे. त्यानंतर कोणत्याही प्रकारे — मुद्रित, इलेक्ट्रॉनिक किंवा समाजमाध्यमांवर — प्रचाराच्या जाहिराती प्रसारित अथवा प्रसिद्ध करता येणार नाहीत, असे राज्य निवडणूक आयोगाने स्पष्ट निर्देश दिले आहेत.
नगरपरिषद व नगरपंचायतींसाठी 2 डिसेंबर 2025 रोजी मतदान होणार असून, महाराष्ट्र नगरपरिषद, नगरपंचायत व औद्योगिक नगरी अधिनियम 1965 अनुसार जाहीर प्रचाराची मुदत 1 डिसेंबर रात्री 10 वाजता संपते. त्यामुळे त्या वेळेनंतर प्रचारसभा, फेऱ्या, ध्वनिक्षेपक तसेच कोणत्याही माध्यमातील जाहिराती पूर्णपणे बंदीच्या अधीन राहतील.
राज्य निवडणूक आयोगाने 9 ऑक्टोबर 2025 रोजी जारी केलेल्या ‘निवडणुकांच्या प्रयोजनार्थ प्रसारमाध्यम संनियंत्रण व जाहिरात प्रामाणन आदेश, 2025’ च्या भाग आठ, परिच्छेद 16 नुसार मतदानाच्या दिवशी — 2 डिसेंबर 2025 रोजी देखील — कोणत्याही माध्यमात प्रचाराच्या जाहिराती प्रसिद्ध करता येणार नाहीत.