पुणे दि. 27 : पुणे महापालिका निवडणुकीच्या पार्श्वभूमीवर राज्याच्या राजकारणात महत्त्वाची हालचाल पाहायला मिळत आहे. मुख्यमंत्री देवेंद्र फडणवीस आणि शिवसेना (शिंदे गट) नेते तथा मंत्री उदय सामंत यांच्यात मुंबईतील मुख्यमंत्री निवासस्थान ‘वर्षा’ बंगल्यावर झालेल्या बैठकीनंतर पुण्यात भाजप–शिवसेना युतीबाबत जोरदार चर्चा सुरू झाली आहे.
या भेटीनंतर भाजपचे पुणे शहराध्यक्ष गणेश बिडकर यांनी सोशल मीडियावर केलेल्या सूचक पोस्टमुळे या चर्चेला अधिकच हवा मिळाली आहे. बिडकरांच्या पोस्टमध्ये “पुण्यासाठी मोठा निर्णय, लवकरच चित्र स्पष्ट होईल” असा उल्लेख असल्याने, ही पोस्ट भाजप–शिवसेना युतीकडे निर्देश करत असल्याचा राजकीय वर्तुळात अंदाज व्यक्त केला जात आहे.
सूत्रांच्या माहितीनुसार, आगामी पुणे महापालिका निवडणुकीत महायुतीतील समन्वय, जागावाटपाचे सूत्र आणि सत्तास्थापनेचा रोडमॅप यावर या बैठकीत प्राथमिक चर्चा झाल्याची शक्यता आहे. विशेषतः भाजप आणि शिंदे गटाची शिवसेना एकत्रितपणे निवडणूक लढवण्याच्या शक्यतेला या बैठकीनंतर बळ मिळाले आहे.
दरम्यान, याबाबत अधिकृतपणे कोणतीही घोषणा करण्यात आलेली नसली तरी, फडणवीस–सामंत भेट आणि त्यानंतरची गणेश बिडकर यांची पोस्ट हे संकेत महत्त्वाचे मानले जात आहेत. त्यामुळे “पुण्यात भाजप–शिवसेना युती जवळपास निश्चित झाली आहे का?” असा प्रश्न आता राजकीय चर्चेच्या केंद्रस्थानी आला आहे.
आगामी काही दिवसांत युतीबाबत स्पष्ट भूमिका आणि अधिकृत घोषणा होण्याची शक्यता असून, पुणे महापालिकेच्या राजकारणात मोठे समीकरण बदलण्याची चिन्हे दिसत आहेत.