मावळ तालुक्यातील उर्से गावात पाच वर्षीय चिमुकलीवर बलात्कार करून तिचा निर्घृण खून केल्याची धक्कादायक घटना उघडकीस आली असून, या घटनेच्या निषेधार्थ आज उर्से गावासह परिसरात कडकडीत बंद पाळण्यात आला. या अमानुष कृत्याने संपूर्ण मावळ तालुका हादरून गेला आहे.
शनिवारी सायंकाळी घरातून बेपत्ता झालेल्या पाच वर्षीय मुलीचा मृतदेह रविवारी गावालगतच्या शेतात आढळून आला. पोलिस तपासात सदर मुलीवर लैंगिक अत्याचार करण्यात आला असून, तिचा गळा आवळून खून केल्याचे स्पष्ट झाले आहे. या घटनेने नागरिकांमध्ये तीव्र संतापाची भावना निर्माण झाली आहे.
पिंपरी-चिंचवड पोलीस यांनी तत्काळ तपास सुरू करत सीसीटीव्ही फुटेज व प्रत्यक्षदर्शी साक्षीदारांच्या आधारे शेजारी राहणाऱ्या समीर कुमार मंडल याला अटक केली आहे. आरोपीने गुन्ह्याची कबुली दिली असून, चॉकलेटचे आमिष दाखवून मुलीला घराबाहेर नेल्याचे तपासात उघड झाले आहे.
या घटनेच्या निषेधार्थ उर्से गाव येथे सर्व दुकाने, शाळा, बाजारपेठा पूर्णपणे बंद ठेवण्यात आल्या. नागरिक, सामाजिक संघटना व ग्रामस्थांनी आरोपीला कठोरात कठोर शिक्षा देण्याची मागणी केली आहे. या घटनेने संपूर्ण मावळ तालुका मध्ये हळहळ व्यक्त होत आहे.